De Cycle 3.1 war an d'Stad an de Naturmusee d'Ausstellung "Farbenfroh" kukken.

Am Kader vun der unité 2 (bon appétit)am Franséischen hu mir am Cycle 3.1 eng "Soupe aux légumes" an der Klass preparéiert. Si huet eis all gudd geschmaacht!

Vum 31. Oktober bis den 6. November ass Vakanz. Mir wënsche jidferengem eng schéi Vakanz. :)

En Dënsden de 6. Dezember ass keng Schoul. Et ass Kleeserchesdag!

E Freiden den 28. Oktober huelen d'Kanner aus dem 4., 5. a 6. Schouljoer zu Miersch um Aidslaf deel. Si lafen eng hallef Stonn fir de gudden Zweck. Di gesponsert Sue si fir d'Aidsforschung an d'Aidsberodung geduecht. D'Eltere kënne gäere kucke kommen an hir Kanner ufeieren.

Um éischte Schouldag mécht 3. Schouljoer an der Turnstonn eng flott Wanderung rondrem Biissen vun 5,5 Kilometer.

Och wann d'Wieder net zu 100% matgespillt huet an sou munchereen kal Fangeren an eng kal Nues kritt huet, wor eist Schoulfest och dëst Joer eng Réussite. A ville flotten Atelieren, ënnert dem Thema Zirkus, hunn d'Kanner aus de Cyclen 1-4 sech gutt ameséiert. E Clown an en Zauberer wore mat vun der Partie an hu Grouss a Kleng un d'Laache bruet.Fir Iessen an Drénken hunn d'Eltre gesuercht. Ee grousse Merci un den Eltrecomité, den Eltreveräin an all di aner Eltren déi sech deen Dag Zäit geholl hu fir ze hëllefen.

Den Ausflug vum Cycle 3.2 op de Wibbel an Dribbel an d'Coque war ee vollen Erfolleg.

D'Kanner hunn 10 verschidde Sportarten erlieft. Alles huet wonnerbar geklappt. Souguer dee stäerkste Mann vun der Welt, de Georges Christen, huet eng Show presentéiert, bei där och de Schoulmeeschter huet missen op der Bühn matman. Een Zauberer huet deene jonke Sportler e puer flott Tricker bäibruegt. Dono gouf et Spaghetti. Et war een utrengenden awer flotten Ofschloss vum Schouljoer.

Eisen Ausflug am Cycle 3.2 op Léifreg war fantastesch.

No engem super Piratenowend hunn 33 kleng Piraten sech den aneren Dag op de Wee no engem eemolege Pirateschatz gemaach. Am Nomëtteg hunn se no engem wahnsinneg ustrengende Piraterallye endlech de Schatz fonnt. Dat war een superspannend Erliefnis. Just déi Reeschauer um Nomëtteg wär net néideg gewiecht.

De Cycle 3.2 war um Schoulsportdag ze Fouss bei d'Luxlait an de Vitarium.

Mir sinn ze Fouss laanscht d'Sportshal, duerch d'Cité Steekräiz iwert de Pëttener Wee bei d'Luxlait getrëppelt. No enger superflotter ofwiesslungsräicher Visite am Vitarium, si mir iwert d'Reckener Strooss zréck gaang. Dat ware ganzer 6 Kilometer.

De Cycle 4 huet fir de Schoulsportdag ee flotte Fousstour organiséiert mat Froe, Spiller an aneren Erausfuerderunge fir d'Kanner.

Den Eltereveräin ënnerstétzt den C4.2 an den C3.2 all Joer mat engem Don fir bei d'Colonie bäizeleeën. D'Kanner an d'Léierpersonal soe Merci!

Les élèves du cycle 4.2 ont écrit des poèmes dont l'inspiration était le fameux poème de Paul Eluard:

Il y a des mots qui font vivre
Et ce sont des mots innocents
Le mot chaleur le mot confiance
Amour justice et le mot liberté
Le mot enfant et le mot gentillesse
Et certains noms de fleurs et
certains noms de fruits
Le mot courage et le mot découvrir
Et le mot frère et le mot camarade
Et certains noms de pays de villages
Et certains noms de femmes et d'amis.

Veuillez lire les productions des petits poètes!

Am Kader vum Projet vum Ministär "Mäi léiwste Kannerbuch" hat de Cycle 4 Enn Abrëll zwou Mammen invitéiert fir an hirer Mammesprooch virzeliesen. Des flott Aktivitéit huet an eiser flotter Bibliothéik stattfond.

Fir 't éischt huet d'Madame Tréfois hiirt léiwste Kannerbuch virgestallt an aus "Alice et la rivière sous terre" virgelies.
D'Madame Schmitz-Khang hat direkt 2 Bicher matbruecht. Dat eent war ee Billerbuch aus hirer fréier Kandheet (Zeraldas Riese) a si huet et verstanen de Kanner de Wäert an d'Wichtegkeet vu Billerbicher nozeleeën. Duerno huet si een Extrait aus "Herr der Ringe" virgelies.
D'Kanner ware ganz intresséiert an hu begeeschtert nogelauschtert a Froe gestallt.
Mir soen deenen 2 Damme villmools Merci fir hire Besuch an hir engagéiert Mataarbécht.

De leschten Dënsden war d'Ausscheedung fir de "Virliesconcours 2011" an der Bibliothéik vun der Biisser Schoul.

6 Schüler aus dem Cycle 4 hunn ee franséischen Text virgelies dee si virdrun ageübt haten - an dat a folgender Reiefolg: Lyse - Julie - Erta - Ana - Dylan - Joana
Di jonk Virlieser ware verständlecherweis immens opgereegt, hunn awer hir Saach ganz gudd gemeet. Fir d'Jury, déi dest Joer aus de 6 Titulaire vum Cycle 4 bestung, war et nit einfach ee Gewënner ze bestëmmen. Nodeem di 2 lescht 2 Finalistinnen een onbekannten Text krute fir virzeliesen ass d'Entscheedung gefall. D'Gewënnerin as d'Ana an hatt vertrëtt di Biisser Schoul elo zu Miersch an den Halleffinallen. Mir gratuléieren him vu ganzem Häerzen a wënschen him vill Erfolleg. Mais och nach eng Kéier ee grousse Respekt fir all di Kanner déi matgemeet hunn. Et kann eebe just ee gewannen.

"Orika" steet fir "Orientatioun fir Kanner". All Joer ginn d'Kanner aus dem Cycle 4.2 verschidde Lyceesgebaier kucken.
Mir waren dest Joer den 30. Mäerz un der Rei. Moies stungen d'Ackerbauschoul an de Lycée technique vun Ettelbréck um Programm. No engem gudde Mëttegiessen an der Mierscher Kantin si mir du nach nomëttes de Mierscher Lycee kucke gaangen. Et war fir d'Kanner ee flotten an informativen Dag. Op deenen eenzelne "portes ouvertes" kënne si nach weider Informatioune kréien.

Am Kader vum Turnen stung des Woch fir di Biisser Schoul Schlittschung fueren um Programm.
Dënsdes den 18. Januar an donneschdes den 20. Januar gung d'Rees all Kéier mat 2 Bussen op Beefort.
D'Kanner hate vill Freed a jidderee krut ee gudde waarme Chocky.

Zenter desem Schouljoer sinn d'Nicole Sinner-Speller an d'Aline Koob-Berns an hirer wuelverdingter Pensioun. D'Biisser Léierpersonal huet dat am Oktober op der Thillsmille gefeiert.

Mir haten Enn Oktober op der Thillsmillen ee schéinen Owend wou mir dem Nicole an dem Aline äddi gesot hunn. Et war eng lëschteg an ongezwongen Atmosphäre. Natierlech goufe vill Spichten an Anekdoten nees opgefrëscht! D'Kolleegen aus dem Cycle 3 hate suguer extra fir desen Owend ee Lidd virbreet an di zwee fuschnei Pensionnäre krute vun äis alleguerten ee flotte Cadeau.

Laang Joeren huet d'Nicole an der Biisser Schoul als "Schouljoffer" geschafft. Dat war nit ëmmer liicht mais ni langweilig. D'Nicole gouf all di Joere vu jidderengem respektéiert - vun de Kanner, vun de Kolleegen a vun den Elteren. Hatt huet säi Beruf "geliewt", d'Kand stung ëmmer am Mëttelpunkt. D'Nicole war eng ganz engagéiert Léierin. Hatt huet sech bis kuerz virun der Pensioun weidergebild a war sech nit ze schued fir nei Methoden auszeprobéieren.

D'Aline huet als "Reliounsjoffer" an der Biisser Schoul geschafft. D'Kanner waren immens frou mat him - an dat nit nëmme wéinst de Kinderüberraschungen déi d'Aline esou gäere verdeelt huet.

Mir wënschen deenen 2 eng flott a laang Pensioun.
Genéisst äer Rou a vergiesst nit heinsdo bei äis an der Biisser Schoul laanscht ze kommen.

D'Chrëschtfeier vum Cycle 2.1 fällt haut wéinst dem schlechte Wieder aus. Mir verleeën d'Feier dowéinst op Freides, den 7. Januar 2011. Ufank vun der Virféierung ass um 15:15 Auer.

En Dënsdeg den 23. November an en Donneschdeg de 25. November huet d'Biisser Léierpersonal eng Formatioun zu Biissen

ënnert dem Titel: "Mündlicher Sprachgebrauch - Analyse und Förderung der Sprech- und Hörkompetenz" all Kéier vu 14.00 bis 19.00 Auer. D'Formatioun gëtt gehale vum Ingrid Messelken, Rektorin, Unterrichtsbeauftragte an der Universität zu Köln a vum
Hans Messelken, Dr., Universitätsprofessor, Köln. D'Organisatioun leeft iwwert de SCRIPT an am Mäerz ass nach eng "Nachbesprechung".